كرفنال هدايا عيد الحب

عيد الحب

كل سنة وأنتم طيبين
طبعا عيد الحب خلاص على الأبواب..

وأكيد في الوقت ده كل بنت وكل شاب كل واحد قاعد عمال يفكر يجيب إيه؟!

ويعمل إيه في اليوم ده؟!

وأكيد كل واحد نفسه يجيب هدية متميزة

علشان يعبر فيها عن مشاعره تجاه الشخص اللي بيحبه

ودى شوية أفكار تساعدكم على الاختيار

مش كده وبس ده فيه مفاجآت تانية كتير أوي

مستعدين تعرفوا

هدايا ترضي جميع الأذواق

دي مجموعة من الأفكار اللي حبينا نقدمهالكم علشان تساعدكم على اختيار الهدية المناسبة....وعلى فكرة احنا جبنا
مجموعة كبيرة من الأفكار علشان نحاول نرضي جميع الأذواق وده لأن فيه ناس بتحب الهدايا التقليدية الخاصة اللي
بتعبر عن عيد الحب وفيه ناس تانية بتحب الهدايا العادية فحبينا نرضي جميع الأذواق بمجموعة الهدايا دي..
نشوف الهدايا

الهدايا المناسبة للبنات

ولأن البنات أولا في كل شيء فدي مجموعة من الهدايا اللي ممكن تيجي للبنات في عيد الحب....

علبة مجوهرات خشب كبيرة متعددة الطوابق علشان البنت تشيل فيها أي مجوهرات عندها أو أي أوراق مهمة

علبة مجوهرات فضة صغيرة ودي علشان تشيل فيها أي حاجة خاصة أنت هتقدمها زي دبلة الخطوبة مثلا

قطعة
إكسسوار زي خاتم أو حلق أو عقد لولي وعلى فكرة ممكن الإكسسوار ده يكون
أصلي "ذهب أبيض" أو "أصفر" أو ممكن يكون تقليد يعني على حسب الإمكانيات
والفلوس اللي معاك

شنطة ماكياج أو شنطة فيها مجموعة شامبوهات للعناية بالبشرة أو الجسم أو أي حاجة من الحاجات اللي بتهم البنات

شال شيك ولو كانت البنت محجبة ممكن تجيب لها مجموعة من الإيشاربات الشيك

قلب في السلسلة علشان تحط فيه صورتها وصورتك أو ممكن تعمل لها سلسلة فضة أو ذهب وتطبع عليها بالليزر صورتك وصورتها

محفظة جلد طبيعي علشان تفضل فاكراك على طول

الهدايا المناسبة للشباب

ممكن
أي بنت تعرف الإنسان اللي هي مرتبطة بيه بيحب إيه وتجيب له الحاجة اللي هو
بيحبها أو ممكن تشوف هو محتاج إيه وتجيبه، والهدايا بتكون زي..

كرافت شيك وياريت تكون لونها نبيتي علشان تكون مناسبة لعيد الحب

محفظة جلد طبيعي علشان يفتكرك بيها على طول

زجاجة بارفان ماركة كويسة

ماكينة حلاقة كهربائية هي غالية شوية بس شيك أوي كهدية

كاميرا ديجيتال أو عادية هيفرح بيها أوي خصوصا لو كان بيحب التصوير..

ساعة يد شيك

كوفية حمراء علشان يلبسها كل عيد حب

ميدالية فضة أو كريستال وعلى فكرة مفيش شاب مش بيحب الهدية دي بالذات

هدايا بسيطة بس بتفرح القلب أوي

فيه
نوعية تانية من الهدايا البسيطة جدا بس على فكرة على قد ما هي بسيطة إلا
أنها بتفرح القلب أوي أكتر من أي هدايا تانية وده لأنها أكتر أنواع
الهدايا المرتبطة بعيد الحب وعلى فكرة الهدايا دي ممكن تمشي للبنات
والولاد كمان....

بوكيه ورد ويا سلام لو كان أحمر

قلب كريستال

بوكيه فيه مجموعة من الدباديب الصغيرة

دبدوب كبير

علبة شيكولاتة ويا سلام بقى لو كانت من النوع اللي بيحبها أو بتحبها

مج فيه شويه حركات دلع تناسب عيد الحب زي قلوب أي كلمة حلوة بتعبر عن الحب

مخدتين كل واحدة فيهم عليها اسم كل واحد فيكم وكل واحد ياخد المخدة اللي مكتوب عليها اسم التاني

مجموعة بالونات حمراء مخصوصة لعيد الحب

برواز خاص بعيد الحب

بس دي كانت شوية أفكار بسيطة علشان
تساعدكم على الاختيار ودلوقتي هنشوف مع
بعض أفكار تانية لهدايا ممكن نعملها بإدينا

هدايا من صنع إيدينا

ولأن مفيش أجمل من الهديا اللي احنا بنعملها بنفسنا في يوم زي ده فدي شوية أفكار بسيطة ممكن نعمل زيها بنفسنا...

شموع عيد الحب من صنع إيدينا!

طبعا
الشموع من أكتر الحاجات المرتبطة بعيد الحب علشان كده بنلاقي إن ثمن
الشموع بيكون غالي جدا في عيد الحب بالرغم من أننا ممكن نعملها بنفسنا ومن
غير ما تكلفنا حاجة خالص مش كده وبس ده احنا كمان ممكن نزينها بنفسنا
وبكده هتبان كأننا شارينها من أحسن وأفخم محل متخصص في الهدايا..

كل اللي هنحتاج إليه:
• حلة كبيرة وحلة تانية أصغر منها وده علشان نعمل حمام ميه ساخن للشموع.
• شموع قديمة ملونة أو بيضاء.
• فازلين.
• فورمات جاهزة لتشكيل الشمع.
الطريقة:
1.
أول حاجة هنعملها هي إننا هنذوب الشموع القديمة اللي عندنا في حمام ميه
سخنة وده عن طريق إننا نحط في الحلة الكبيرة الميه ونحطها على النار علشان
الميه تسخن وبعد كده نحط الحلة الصغيرة في الحلة الكبيرة ونحط فيها الشمع
ونغلي الميه لغاية ما الشمع يذوب تماما.
2. هنجيب فورمات
جاهزة لتشكيل الشمع وندهنها بالفازلين وده علشان يكون سهل علينا إننا نخرج
الشمع المشكل منها...بعد كده هنثبت الفتيل أو الدوبارة عن طريق ربط الفتيل
في قلم رصاص ونضع القلم الرصاص على سطح الفورمة اللي هنحط فيها الشمع وبعد
كده نصب الشمع وناخد بالنا إن الفتيل يكون نازل في داخل الفورمة دي.

3. هنسيب الشمع لغاية ما يبرد نهائي وبعد كده نخرجه.
بكده
بقى عندنا مجموعة من الشموع الجميلة اللي احنا عاملينها بإيدينا وعلى فكرة
احنا لينا حرية الاختيار في عمل أي حجم للشموع احنا عايزينه فمثلا ممكن
نعمل نفس الفكرة السابقة ونصب الشموع فورمة صغيرة صغيرة على شكل قلوب أو
ممكن نعملها بحجم الشمعة العادية أو ممكن نعملها كبيرة..
على فكرة ممكن نزين الشموع دي بأي شكل احنا عايزينه، ودي شوية أفكار ممكن تساعدنا في تزيين شموع عيد الحب..

شموع بأشكال جديدة
شمعة عريضة ملفوف عليها كارتون ملون مقصوص على
شكل قلب بالإضافة إلى بعض من حبات اللولي اللي احنا
بنركبها بالخيط على الكارتون وبعد كده بنلزقهم على
الشمعة

مجموعة من الشموع العريضة ملزوق عليها أوراق الأشجار

مجموعة من الشموع العريضة منثور عليها مادة ملمعة يأي شكل احنا عايزينه

كمان ممكن نحط الشموع في كاسات شفافة أو كوبايات شفافة

كمان ممكن نعمل الشموع دي ونحطها على حامل فيرفورجيه"حديد"

كارت من صنع إيدينا!

أكيد استحالة نقدم هدية من غير ما نقدم معها الكارت بس المرة دي الكارت غير كل مرة لأن الكارت المرة دي هيكون من صنع إيدينا احنا...

ودي فكرة لكارت ممكن نعمله بإيدينا

كل اللي هنحتاج إليه:
• نصف فرخ ورق كانسون أو كارتون أبيض أو أصفر.
• مجموعة شرائط ستان رفيعة لونها أحمر.
• شريط ستان رفيع لونه أخضر.
• قلم أسود أو أحمر.
• مسدس شمع.
• مقص.

الطريقة:
هنطوي
ورق الكانسون نصفين ونجيب شرائط الستان الرفيعة ونلف كل واحدة منهم حوالين
نفسها على شكل دائري ونلزقها من الطرف بمسدس الشمع...هنعمل مجموعة من
الشرائط دي وده علشان نلزقها بمسدس الشمع على الكارت على هيئة قلب زي ما
في الصورة.
هنجيب الشريط الأخضر ونقطعه شرائح رفيعة ونلزق كل شريحة منه بجوار القلب بحيث إنها تدي شكل زي ما في الصورة....
هنجيب القلم الأسود ونكتب أي كلمة حلوة تكون طالعة من قلبنا..

ودي فكرة لكارت تاني ممكن نعمله

كل اللي هنحتاج إليه:

• نصف فرخ ورق كانسون أو كارتون روز أو أي لون احنا نحبه.
• مجموعة مشابك ورق.
• دوبارة "خيط سميك".
• مسدس شمع.
• مقص.
• 2شرائط لزق ملونة.
• مجموعة من القلوب الصغيرة.

الطريقة:

هنطوي
ورق الكانسون نصين وبعد كده هنلزق الشرائط الملونة على طرف ورق
الكانسون..وبعد كده هنلزق فتلة الدوبارة في طرفي الكارت...ونجيب القلوب
الصغيرة ونعلقها باستخدام المشابك في الدوبارة وممكن نكتب أي كملة حلوة
طالعة من قلبنا على الكارت ده.

ودي مجموعة تانية من الكروت ممكن نبص عليهم ونحاول ننفذ زيهم

تورتة عيد الحب من صنع إيدك!

وعلشان
عيد الحب يبقى عيد حب يبقى لازم كل بنت تعمل للإنسان اللي بتحبه حاجة من
إيديها لأن زي ما كلنا عارفين إن أقرب طريق إلى قلب الراجل هو معدته...مش
كده ولا إيه؟!
ودي طريقة عمل تورتة عيد الحب

المقادير للكيكة الإسفنجية:

• 5 بيضات.
• كوب ونصف سكر بودرة.
• 1كوب سمن.
• 3 كوب دقيق.
• 1 معلقة صغيرة فانيليا.
• 1 معلقة صغيرة بيكنج بودر.
• كوب ونصف كاكاو.

هذا النص باللون الأزرق
الطريقة:

1.
هاتي البيض واكسريه في إناء عميق وضيفي إليه السكر والفانيليا واضربيهم مع
بعض "بالمضرب الكربائهي" لمدة ربع ساعة أو لغاية ما تلاقي الخليط ده بقى
عامل زي الكريمة...
2. بعد كده هاتي الدقيق والبيكنج بودر وضيفيهم لبعض ولو عايزة تعملي كيكة بالشيكولاتة ممكن تضيفي إليهم "الكاكاو"...
3.
ضيفي الدقيق والبيكنج باودر بالتدريج إلى البيض والسكر وقلبيهم مع بعض
كويس باستخدام معلقة خشب بس خدي بالك إن التقليب يكون بالراحة.
4.
بعد كده هاتي قالب كيك على شكل قلب وادهني القاع والجوانب بشوية سمنة ورشي
رشة صغيرة من الدقيق علشان الكيكة ماتلزقش منك في الصينية وبعد كده صبي
خليط الكيكة فيها....
5. شغلي الفرن
لمدة 5 دقائق وبعد كده دخلي صينية الكيكة الفرن وخلي درجة الحرارة متوسطة
وسيبيها لمدة 40 دقيقة أو لغاية ما تلاقي وشها احمر....
6.
ولو عايزة تتأكدي من إن الكيكة استوت من جوه يبقى ممكن تجيبي سكينة نضيفة
وتحطيها في وسط الكيكة، لو خرجت السكينة نضيفة زي ما هي يبقى كده الكيكة
استوت من جوه، لكن لو خرجت وفيها أي حاجة يبقى الكيكة ماستوتش..بعد ما
تستوي الكيكة خرجيها من الفرن وسيبيها شوية لغاية ما تبرد علشان تقدري إنك
تنقليها في صينية تانية مستديرة وخدي بالك وإنتِ بتنقليها إنك تحطيها على
وشها بحيث تبقى الناحية اللي تحت فوق واللي فوق تحت.
طريقة تزيين وحشو التورتة:

المقادير:

• زيدة.
• لبن.
• مربى.
• علبة كمبوت أناناس.
• 1/2 كيلو فراولة.
• علبة بودرة كريم شانتيه.
• جوزة الهند مبشورة.
• تشكيلة مكسرات مفرومة "لوز وبندق وجوز وفستق"
• كريز.
• قمع لتزويق التورتة.

الطريقة:
1. طلعي الزبدة من التلاجة وسيبيها لمدة نصف ساعة علشان لما تيجي تستعمليها تلاقيها سايحة شوية...
2.
هاتي طبق عميق وحطي فيه اللبن البارد وبعد كده ضيفي إليه علبة بودرة
"الكريم شانتيه" واضربيهم مع بعض كويس بالمضرب الكهربائي، لمدة عشر دقائق
وبعد كده حطي الكريم شانتيه في الفريزر...
7.
هاتي الكيكة وقسميها باستخدام سكينة الحلويات إلى طبقتين، وخدي الطبقة
الأولى وحطيها على صينية تانية ورشي عليها ماء الكمبوت..وعلى سطح النصف
التاني من الكيكة هتفردي طبقة من الزبدة بعد كده طبقة مربى "أي نوع مربى
عندك" بعد كده ضمي الجزئين على بعض.
8.
هاتي الكريم شانتيه وغطي الكيكة كلها بيه باستخدام ضهر المعلقة... وهاتي
القمع وحطي فيه كريم شانتيه وزوقي الأطراف، وعلى فكرة ممكن تحطي على
الجوانب جوز الهند والمكسرات المفرومة اللي عندك.
9.
بعد كده هاتي أي نوع فاكهة عندك "فراولة أو تفاح" وقطعيهم إلى شرائح أو
قطع الأناناس اللي موجودة عندك والكريز وزوقي سطح التورتة بالشكل اللي
إنتِ بتحبيه، بعد كده حطيها في التلاجة لمدة نص ساعة.

» كلمات عن الحب
» قاموس الحب
» الحب الحقيقي هو:
» اصدق ما قيل عن الحب
» لمن يعرف الحب فقط ..!!!!